娥妃傳（一）

禮賓宮外，陣陣風聲。

小衛子氣沖沖地走入宮中，向主子報喜訊，「娥妃娘娘！奴才打聽到皇上過兩日會親臨大鵬宮，想必一定會翻娘娘你嘅牌子呢！」

「好呀小衛子！皇上終於想到本宮啦，想到皇上舊年係濠鏡宮賞賜誠妃嘅時候，實在恨死隔離，半夜三更重叫本宮去訓話，真係氣死人！」娥妃安坐宮中聞得吉報，一下子喜形於色，奴顏媚骨盡出。

「不過，好在皇上月前賞賜《各安天命》御筆，足證皇上仍念昔日舊情，本宮向其早請示晚匯報，時不時歌頌禮讚，迎難而上，哩次重感動唔到皇上？」

娥妃說罷望向禮賓宮內一眾奴才，小宗子、小波子、藥華等太監宮女見到主子反應甚為激烈，不禁面面相覷，生怕講錯一句，動輒得咎，只好唯唯諾諾：「恭喜娘娘！」「賀喜娘娘！」「皇上聖鑒，一定睇到架！」

「雖然本宮採購唔到美利堅嘅胭脂水粉，但係唔緊要，只要我地心入面有皇上，時時為大清領土完整着想，終會得蒙聖寵！」娥妃轉念一想，時時向其冷言冷語嘅姐姐儀妃如今已被打入冷宮，就算靠身穿旗裝留倩影都未能翻身，不禁嬌嗔一聲偷笑，「呀！」

禮賓宮奴才之首小宗子見娘娘狀甚興奮，還是忍不住提醒：「之前娘娘你答應立及寺嘅主持，話會抄寫經書為香江作福，如今離交經之日只有兩天，如今恐怕未必趕得及呀。」

娥妃一聽，頓即大怒：「混帳！你哩個狗奴才跟隨本宮咁多年，如今孰輕孰重竟然分唔清？」小宗子即刻跪下叩頭認罪，響頭聲幾乎傳遍整個禮賓宮。

「皇上赴大鵬宮宣旨，字字珠璣，一句頂一萬句，而且有咗皇上為香江加持，抄嘅經書特別見效，點可以唔加埋皇上過兩日嘅金口玉言呢？」說罷，娥妃轉嗔為喜，含春一笑，「皇上一定會翻本宮嘅牌子，如有幸喜結龍種，到時重唔聲價十倍！哈！」

「小宗子唔使再叩頭啦，念在你多年苦勞，有頭髮做到無咩頭髮，你就將功抵過，係本宮承召之時，你就留守禮賓宮抄經，退下吧！」娥妃手一揚，小宗子立時大呼「謝娘娘恕罪，謝娘娘恕罪」，便躬身離去。

「人來！扶本宮入房！」娥妃起身，邊走邊問藥華：「你話皇上喜歡上個月廣儲司送過嚟個件紅色旗袍，抑或藍色個套呢？」

「娘娘你著咩都咁合皇上心意架啦，邊套都咁靚，不過依奴才愚見，紅色睇上嚟喜慶啲，而藍色呢就…」

藥華話未說完，娥妃已自個兒在默念：「紅色夠喜慶呀……紅色好呀……全國山河一片紅……好意頭……好……好……」

（完）