約道柒號劇場（十一）紐約

正當香江搞到一鑊泡之際，枱面上都叫做第三號人物嘅薯片叔叔，竟然人在New York。
「New York～New York～」一邊哼著歌走進屋的薯片叔叔看來心情大好：「估唔到你係Manhattan有座行宮喎，成塊落地玻璃睇到曬成個Wall Street同Brooklyn Bridge，哩度比起約道個邊咪重過癮！」
「話曬一場老友兼舊同事喎，剛好我又係New York，唔通唔招呼你上黎坐下咩？」屋主不是別人，正是有福之人唐家公子。
「睇你平時咪收埋啲囡囡係到風流快活！黎，俾啲好野你！」薯片叔叔將一物拋向唐，唐接住後才知道是一筒薯片。
「咁直腸直肚唔搞語言偽術，唔似你老細喎。」唐唐潤一潤在所難免，然後便打開薯片試吃，「人地叫你薯片叔叔真係冇叫錯，咁鍾意食薯片，你就應該講食少啲費事又入廠……唔……『習習習』……哩隻新野喎花生味！」
「講起689就扯火啦！」薯片叔叔面色一變、一臉不忿道。
「唔係嘛，你老細喎？」唐唐有少少串向扮無知地問。
「『佔中』單野本來搞幾日就等散水啦，點知個條仆街落order向班靚仔放87粒催淚彈，谷到更多人上街，搞到連奶媽放緊假都要急call番黎香港同佢揹鑊，一陣重搵班字頭拆喎，你話死唔死喎！」薯片叔叔越說越氣惱，也一把一把的吃著花生味薯片。
「你唔係唔知我架，呢鑊佢仲唔冚家鏟！我都唔係第一日同你講架啦薯片叔叔，涼粉咩色架？咪黑色囉！」
「最弊我唔係涼粉嘛，佢成班爛鬼師爺，好似飯焦啊咩志剛同佢諗計，重話想開槍喎，搞到連隻離種都話屌到佢上天花板。好彩我剛好有個美國trip，幾大都走左先啦，唔洗對住條友同個局！」說到此處，薯片叔叔心情變好，「習習聲」起勁地吃著薯片。
「咁又係啊，嘩見你又去New York又去Boston，起碼都十日八日，點都食番隻龍蝦先走。」唐唐的話題都總會提起享受人生，「隻狼下下都叫奶媽搞掂蘇州屎，依加連影都冇埋，幾日都扮拉登『電視講話』治港，衰過你寫blog治港喎。不過你又係啦，臨走都要寫篇抽水，話咩推倒『城牆』，係咪意有所指先？」
「屌，講呢啲！」薯片叔叔尷尬地笑著，「不過佢今日冇出片喎，澳洲個邊又爆埋佢涉貪單野，反而我想知唐政協你有冇收到上面咩風聲，係咪上面放啲黑材料出黎啊、定係佢俾中紀委『雙規』左，搞到今日連片都拍唔到。」
「冇喎。佢唔係你老細黎嘅咩？咁你都唔知？」唐唐大笑問道。
「你唔係唔知條友小氣又記仇，除左班黑底涼粉之外就冇朋友加嘛？計我睇黎，好快上面又放幾單黑材料，佢好快就好似董伯伯咁『腳痛』啦！」
「你咪高興住喎，隻狼走左，一陣都可能係奶媽頂住先，你就做奶媽個位。嘩！成堆茂波啊克儉啊禿鷹，點湊啊？」
「屌，到時我重唔炒撚曬佢地，到時真係爽皮啦！」薯片叔叔立時起身，唱老歌跳老舞：「Start spreading the news, I am leaving today, I want to be a part of it, New York～New York～ 」
「黎黎黎，我開左支87年嘅好野，配你哩隻花生味薯片零舍香口，我地為隻狼鷹早日身敗名裂乾杯！」「勝嘅！」

約道柒號劇場（十）公關

話說哩晚唐唐一邊等著睇德法大戰，一邊飲杯紅酒，一邊食緊花生，說時遲那時快，田大少同大龜兩個老友早早就到左約道柒號地牢個私竇。
「睇你條友日日掛住飲紅酒食花生，因住收尾兩年爆血管喎！」田大少一見唐唐大口大口食花生飲紅酒便道。大龜走上前拿住酒瓶一看，笑道：「82年喎！今晚你因咩咁高興啊Henry？」
唐唐斜睨著兩人，略帶輕佻地裝模作樣：「嗱！田少，咁樣講就不單只顯露出你嘅淺薄無知，而且冷血、涼薄啦！事關多飲紅酒有益血管，花生營養豐富，食得多重長壽啲啦。」唐唐接著大龜遞給他的酒瓶說：「今日花生期貨升得幾快啊！又有大批韓國資金入貨，嘩！到左今晚，香港個班友又跟住高追，重唔賺到笑咩！你知唔知啊大龜，今期啲花生啊，食落口啖啖都有泡菜味啊思密達！」唐唐今晚興致甚高，竟忽然講起泡菜語來。
大龜笑道：「你咪話啦，嘩今日我聽到話個個雜種後生個時似咩『都教授』喎，真係笑死人！」
田大少插話笑道：「大龜你笑什麼？你又咪係韓國人！」
唐唐搖了搖手，指著大龜道：「嗱田少，你係唔係泡菜人我唔咁講，但我肯肯定大龜唔係韓國人。點解哩，你睇下佢成個阿基諾咁款，佢重唔係賓佬！」
大龜苦笑了一下，有點不忿，還嘴道：「Henry，啊唐太又咪似個個商台DJ！」
田大少頓覺講下去略帶火藥味，便順勢轉了轉話題：「唐公子你有個咁嘅老婆真係有福氣啦，同你食曬所有野之餘又得體，嘩，我今日係電視機見到689個老婆係度罵街，真係唔嚇死都笑死囉！」
唐唐聽到田大少提起狼妻，興致又來了，馬上乾了手頭那杯滿滿的82年，「哈」的一聲後說：「嘩我上個禮拜本來以為隻狼會食住個勢扮曬可憐撐個女，點知，嘩，佢老婆冇啦啦出黎發曬癲，七情上面走去罵個中大個教授話咩極之憤慨同遺憾喎，成個師奶劇個啲惡死後抵乸，好似差啲連記者支咪都想食埋，嘩，見到你咁都唔抵可憐啦下嘛？」
大龜道：「邊似你老婆個時出黎頂咁有公關伎倆啊Henry，佢有個咁嘅老婆真係冇得頂啦。狼妻重話自己唔係公關伎倆、亦唔係語言偽術喎，學佢個女話齋：my mother unfortunately doesn't have much of a brain！佢都冇腦嘅，點會有公關可言呢？」
田大少接著說：「一個冇腦，一個只係識啲lame PR stunt，明明你擺個女出黎玩家庭樂就係利用緊傳媒放料，有個咁惡屎能登嘅老母啊硬係籠裡雞作反啦，你又唔怪得人話你借個女玩政治公關show，狼毒咪一樣吃女兒！」
「怪唔得田少你前幾日走去左裝支大支野嘅香啦，原來係求神拜佛等佢就快香！」唐唐拿起手機點一下面書，便出現了田大少前幾日裝香個張相，接著唐唐放下手機和酒杯，似乎是用著特別的朗誦搖頭擺腦念道：「當我知道梁先生佢原來係一位地下黨員嘅時候，我不禁倒抽一口涼氣，我實在為香港市民，有一位咁樣嘅、所謂『特首』覺得擔憂。」更學似狼太在特首二字時舉手做引號手勢，田大少和大龜二人不禁笑倒。

約道柒號劇場（九）高招

在此多事之夏，早已貴為政協的唐唐一一置身事外，晚晚紅酒送新聞，不亦快哉。是夜亦然。
大龜早早由垃圾會退場，到唐唐私竇與老友一聚，見老友Henry一如已往手拿一杯Lafite細味品嘗，開口便鬧：「頂你今日垃圾會搞邊科，個粒屌那星食錯藥啊，都唔跟規矩監粗黎，咪俾班泛民食住上囉，又同啊鼠王『眉來眼去』，嘩大佬啊佢有冇重口味啲啊！」
趁大龜大吵大鬧之際，唐政協已不徐不疾倒了一杯Lafite遞給大龜：「黎黎黎，飲番啖87年下吓火先啦。成班地產佬新界佬都想食哩舊肥肉，但係又唔好意思大大聲話『我係囤地啊吹咩』，你睇下謬波係哩單野閃閃縮縮，依加監粗搞掂，話知你有幾撚多人示威，舊錢就肯定袋袋平安，話唔定今晚茂波就同班地產佬Happy緊啦，點止係IFC殘廁嘆coffee啊！」唐唐想起成班樣衰啊叔係度攬女，不禁失笑。
大龜亦笑道：「屌！你平時都攬唔少啦！」大龜頓了一頓再說：「話說回來，隻鷹哩次又去做左離岸特首，咁又俾佢過到，係唔係路啊？」
唐唐聽到689之名，驚訝地問：「大龜你唔知佢個女單野咩？」
「哦，狼女界刂手嘛，一陣又走去影全家福，Old News啦！」
唐唐搖搖手，嘆氣道：「你真係冇撚睇新聞，有報紙佬報出黎，話狼女爆料嘛！咁大單野你都唔知？」
「頂你我成日係垃圾會都冇好氣啦，重睇新聞？即係點啊屌？」
「佢話影全家福個主意係狼英嘅垃圾PR主意，成單野扮出黎，至於佢話佢好撚憎佢老母，界刂手都係因為佢喎。」
這時到大龜驚訝：「喂Henry唔似你喎，聽到隻鷹啲仆街野，你好應該幸災樂禍至係加，反而你今日反而只係開枝三皮嘅紅酒？」
「拿，計我話哩次隻鷹真係高招！」唐唐指一指播著新聞的電視，「兩單野個時間咁緊密，你都睇到啦，香港人最鍾意睇人仆街又八卦，依加佢個女籠裡雞作反，夠曬仆街同八卦啦掛？一個唔該，大家都放曬個focus落去佢個女，東北單野冇人理加啦。
「唔係喎，咁搞法隻鷹個image又仆直囉此其一，實際上佢重有好多步棋，第一佢可以話個女講嘅野係假，番香港個日隻鷹咪帶埋老婆仔女陷家富貴咁落機，成班好似『愛回家』咁，話依加年輕人亂講野亂發癲，依加個女終於肯認錯啦，一個唔該抽依加圍垃圾會個班靚仔，話應該回頭是岸，又可以告班傳媒，懶係道德咁，咁咪攞香港成班無知師奶嘅分囉，重驚咩七一啊？第二，佢可以話個採訪係真，然後過兩日番香港，就扮曬可憐咁屌班傳媒禍不及妻兒，咁反而build up番佢保護妻兒個image。所以我咪話隻鷹今次高囉，今次真係甘拜下風，我佢次賣妻都冇佢咁厲害。」
聽了唐唐一番偉論，大龜恍然大悟：「啊，聽Henry你一言，有如天花亂墜，將我點完又化，阿彌陀佛！善哉善哉！」