約道柒號劇場（六）典禮

（刊於《反黑報》第九至廿期合輯，2012年11月15日）
「咁難得你俾面黎我地學校做嘉賓，我特登叫曬班學生黎歡迎你加！」大龜陪住唐唐走進那間他冠名贊助的學校，只見學生們手持花束、拉著紅底黃字橫額夾道歡迎，大有「支那style」的味道，只欠句古天樂腔的「熱烈歡迎」而已。
「啊！你好搞唔搞，學埋曬D強國野，搞埋啲咁嘅馬騮戲，你估依加『喜迎十八大』啊？當我係大陸個班貪官咩！」唐唐靠向大龜耳語不滿，雖然他心裡還是在暗爽。心情大好的他，說完後便向學生們露出那副有點像金魚佬的笑容，接過花束，向獻花的女學生問好：「小妹妹，你今年中幾啊？」「中四！」「咁你食左飯未啊？」面對唐唐慣常的無厘頭問題，女學生一時反應不及，只結結巴巴地說：「我……我食左啦唐先生！」
身旁大龜拉一拉唐唐說：「黎黎黎，我地不如先去禮堂個邊坐下好唔好呢？」待唐唐向女學生道別、兩人走開一旁後，大龜便略帶抱怨說：「真係你啊，咪鬼搞啲學生妹啦！」

到了禮堂後，兩人坐在嘉賓席上，唐唐開口道：「大龜，唔洗咁緊張喎，我都係同個妹妹仔講下笑姐！」他一臉不在乎的樣子說：「以前做官就要成日去埋曬啲咩鬼典禮姐，坐足幾個鐘去睇個班濕鳩大學生畢業，屌！真係悶撚到我啊！重有個次係中大攞個榮譽博士，班學生又話要抗議哩樣個樣，真係好讀唔讀，讀埋曬Ｄ屎片！好彩有得睇下班後生女，嘩！真係十八廿二青春無敵，不過個個都著曬畢業袍，咩身材都睇唔到，都係爭咁啲。不過咁，依加『無官一身輕』，我坐係地牢嘆番杯90年嘅Mouton Rothschild、聽下Mozart咪重過癮！拿，今次見係你炸大龜，一陣完左典禮，點都要帶我參觀下你間學校！」
「學校就當然會帶你去慢慢睇，妹妹仔就唔好搞我地呢度啦！不過你都有眼見加，我啲學生不知幾愛國愛港，唔會話好似『學民思潮』個班0靚仔咁，佔領政府總部作曬反咁，不過個陣隻鷹就唔荒唔狼啦！」
「即係咩姐？講啲唔講啲！」唐唐急問。
「咁你都唔知？狼狽個狼啊啊嘛！」大龜懶醒道。「話時話，聽聞遲啲隻鷹會去個間咩鬼大學主禮……」
「哦！嶺南啊，學個隻咁嘅『左耳陳』話齋，哩間直情係『港獨』集中營，除左個班搞咩鬼研究嘅教授，次次都寫埋啲爛鬼文章插政府，重有個個咩陳雲呢，當正自己係教主，成日話香港要自治喎，係度指點江山。你睇下尖沙咀、銅鑼灣個班法輪功啊，成日話『天滅中共』，又咪係得個講字！點之阿爺連咁都唔高興，隻鷹呢排都唔知落多左幾多層鞋油！計我話呢，最好叫誠哥好似日本咁，成個香港買起佢，我地就有錢繼續搵啦！」
「係喎！佢好似以前重係人地校董黎，不過依加隻鷹都衰到貼地，去到俾成班學生嘈兩嘈，睇佢個款又咪係黑起塊面！再唔係咪訓話個時死淨把口，加多兩句咩『閉關鎖港』、『蹉跎歲月』！挑！」大龜不屑說道。
「哎啊！一諗起隻鷹板起副面，黑過黑鮑咁，睇見就想開香檳！」唐唐更『啵』的一聲扮起開香檳來，繼續揶揄：「佢成日以為度度都係佢主場，最後又咪連自己屋企隻Hello Kitty都唔到佢話事！聽聞佢依排坐正禮賓府喎，唉！以前煲呔養埋養埋個啲錦鯉，實俾佢攞黎出氣玩鳩死曬！」

「算吧啦，佢隻馬仔啊『淋糞強』呢，依排搞到一鑊粥，但係又死唔斷氣，又話休假喎，唉真係攞著數都唔唔好咁啊，做壞曬規矩，真係『鄧』個時阿松唔抵啊！」接著大龜好奇問：「你估下到時班靚仔有咩招呼隻鷹啊啦？」
「我醒起啦！之前林公公咪俾人掟狗餅嘅，你知啦班後生仔咩都夠膽死嘛，唔方到時有人整盤屎水，一下淋落個隻鷹度，嘩真係到時唔方唔『淋糞強』囉！真係臭到全港九新界都知啊！」唐唐更舉起食指搖兩搖，笑吟吟地說：「拿！有先例可循加，冇得佢抵賴啊！」
「拿我同你講，呢層就一定唔會啦！點解呢？就算到時真係有人向佢淋屎，坐係旁邊個位啊梁門唐氏，一定會第一時間奮不顧身咁撲出黎同隻鷹擋左去，重要擋完之後即刻問隻鷹有冇事喎！啊，呢啲先係我地香江第一夫人嘛，無論唐營梁營，香港人嘅太太都係咁型！」大龜舉起手指公：「拿！都係有先例可循加！」
「啊，仆你個街啊大龜，又係度串鳩我！不過總之計我話齋，一日隻鷹重係度，一日都有好戲睇，我地入定啲花生期貨就差唔多啦！」
「Henry，我保證哩度一定唔會有人淋你糞嘅，哈哈！上台啦上台啦……」大龜抓著唐唐的膊頭說，好像當日落選時唐唐淚灑會展，大龜還是這樣安慰著那個哭了的Henry一樣。