約道柒號劇場（五）阿松

某公司的周年酒會中，冠蓋雲集。
「唐生！好耐冇見，哩排又係春風滿面喎！」阿松碰到他那位「腳頭好」的繼任人，不忘上前聊天。
「喂，阿松，好少見你黎酒會喎，仔細老婆嫩，唔洗番去陪佢地咩？」兩杯落肚的唐唐今晚滿場飛，語帶譏諷向阿松說。
「唉啊，咪就係要陪佢地先少去應酬囉！鬼叫哩間公司係我地大客，點都要俾下面掛！」一提起插水皇后，阿松臉色即刻變成恆指插水二千點咁嘅樣。
「嘩，一提老婆姐，你洗唔洗怕成咁啊？」唐唐不免又抽水一番：「不過哩，屋企有個咁靚嘅老婆，夜晚有得『躝』番上張床到，怕下有咩所謂姐！」
「咁又係，老婆係攞黎錫嘅，怕下佢，都係情趣黎嘅！」經唐唐點化，阿松心中的恆指又升番三千點。
「你估好似啊思歪咩屌，先個排佢先係班台灣佬面前話喎，『香港人繼續怕老婆，繼續唔怕政府』，自己怕老婆呢，就唔好以為全香港人都陪佢怕，睇佢老婆兇神惡煞咁，僭建單野隻鷹重擺佢老婆上台喎，佢梗係晚晚跪玻璃跪到矇左頂啦。」提起隻鷹，唐唐又氣又好笑。
「佢又邊似得你個『輸錢』老婆咁好『相與』啊！」又到阿松抽番唐唐水：「又同啊胡仔去『課外活動』，你真係香港男人典範囉！」
「論好『相與』又點及你老婆啊，唔係你邊度可以精力旺盛、你老婆生完又生啊！」唐唐連消帶抽，真箇風流公子，又說：「你有冇睇前排沉船單野，係醫院呢，隻鷹企係李剛一邊，都唔止係『我爸是李剛』！」唐唐還特別扮著祖國的「富二代」，用普通話說著，殊不知他其實自己也是。
「咁係咩呢？」阿松問。
此時，他放下紅酒杯，雙臂做出交叉手勢，扮著『學民思潮』的樣子：「你估唔係班細路『日以繼夜、夜以繼日』，晚晚係政總出面個度叫『撤、撤、撤！』，全個香港日日成幾萬幾萬人叫佢『切』喎，幾壯觀啊！依加佢咪搞到成個太監，咁企係『主子』身邊侍奉囉！你睇下，依加連國教都話『撤』啦，政府咩威信啊、咩雄風啊都無曬，食幾多『偉哥』、派幾多糖都冇撚用啦，係咪先！」
「啊屌，真係虧你諗得出啦！」阿松不禁拍案叫絕。
「依加諗番我都『登』你唔抵啊阿松仔。個隻劏房波明明飲大左兩杯，都話自己無醉駕，厚著面皮繼續做局長，唔似得你面皮薄，都係想早啲買架保母車姐抵啲姐，班報紙佬又哩又路，班犯民又嘈嘈閉啦……」
聽到此時，阿松不禁氣頂，插話道：「唉！我唔似得佢地咁無恥嘛！明明飲左兩杯又話自己符合法例要求冇醉駕，屌！你話係咪無恥過民記啊！
唐唐此時好言安慰道：「算啦，入得政府都唔好得去邊，我地兩個依加無官一身輕，黎黎黎！」又倒了滿滿一杯82年lafite遞給阿松：「今晚飲多兩杯，睇隻鷹上任百日之後點樣繼續仆街，我地同佢做定做頭七都似啦！勝嘅！」